Linux hi hmang kan tam lem lo khawp maia, keini ram zim te chu sawi loh, khawvel pum huap ang pawhin Windows hmangtu te nen chuan tekhin chi pawh a nilo, Windows hmangtu a let chuang fe in an tam zawk. Nimahsela, ditribution hman tur kan thlan thiam dan leh kan computer hman duh dan azir in software development khawih tan phei chuan Windows ai pawha hman a nawm na chen tamtak a awm a ni.

Ngati nge Linux hmang computer te an lar ve loh?

Server khawvelah chuan an lar teh meuh mai. Tuna he blog i chhiar lai mek leh internet a website zaa sawmkua (90%) aia tam mah hian Linux kernel hmang operating system hi an server atan an hmang ani. Nimahsela, office work: Excel Sheet tih te,Word te, Docs tih vel khawih nitin tan chuan Linux computer chu hman a chakawm vak lovang tih chu a hriatthiam theih mai. A chhan chu heng software te hi Microsoft ta an nih angin anmahni operating system (Windows) ah bak a awm lova, Microsoft Office Applications hi hmang duh anih chuan WIndows i hman ngei ngei a ngai tihna a ni.

Software Compatibilty:

Linux pawh hian hetiang sheet te, docs te leh presentation siamna tur ang Microsoft Office aiawh: LibreOffice te, OnlyOffice tih te hi chu an nei ve vek tho va, nimahsela Microsoft ho software nena khaikhin chuan hnufual na tamtak an la neia, chuvang chuan a dang hman an iai phah thin. Tin, Adobe software engpawh, Photoshop, Premiere Pro, etc hmang chi i nih chuan Linux ah a Adobe software a run theh loh tawp bawk. A aiawih tur software erawh alo awm ve leh mai zel, mahse sawi tawh ang khan, open-source te an nihna angin duhkhawp lohna sawi tur erawh a tam thin. Chu vang chuan mi tamtak chuan Linux hman hi an hreh phah thin.

User Experience:

Software mil loh a nei zauh zauh lam kha chu lo dahtha ta ila, mi in Linux kan sawia an zuam loh ruk deuh riau thin nachhan chu hmanlai khan Linux khawl ho hi a changkang har bik si a, ti mai teh ang. Terminal a command hmanga khawih zel a ngaih avang khan duhtawka a khawl han ching let kual vel tur kha chuan thiam ngai leh hriat belh ngai kha alo tam thin lutuka, chu ai chuan WIndows te anga, mouse a kawh a, click zet zet kha alo awlsam fe zawk bawk nen. Windows chu mi tamtak duh ber a ni chho ta zel a.

Mahse hun alo kal zela Linux distribution hrang hrang a rawn piang ta teuh maia. Linux hi, a operating system pumpui a ni lova, a kernel (A khawl leh a software inbiak pawh tir tu) chauh ani a, chumi behchhan chuan mi in an duh dan ang ang in anmahni pualin distribution (distro) anlo siam ve ami zel ani (engkim a free vek). He blog ka ziah lai mek phei hi chuan distro 600 chuang a awma, 500 chuang hi a active (hman theih) mek ani.

Ngati nge server atan Linux kher?

Chuti khawpa peng ngah leh lian chu a ni a, web server khawvelah phei chuan lar vet vet tak ani. Website emaw eng emaw internet ah host dawn ta la, Linux server i hman loh chuan miin mak an ti zawk ngawt ang che. Chuti khawpa server atana an hman nasat chhan chu, Windows angin crash thut thut te, hunlo deuha amaha lo in update ve sek te kha a awm ve loa, a stable em em a, website kan host na server te ang chu tih thih emaw downtime neih tir thiang ani lova, khawl tih thih thiang lo a hman atan chuan a tha ber ani. I duh hunah i update mai anga, i duh hunah maintenance i ti mai anga, nangman thil pawi khawih danglam i nei anih loh chuan a chhe mai mai lovang.

Linux chu tu te tan nge?

Linux install ve duh si, bul tan ngaihna hrelo tan leh eng ber nge install tur hrelo tan hei hi tips angreng deuhin kalo chhawp chhuak ve ani. Tu tan bik tih pawh a awm lova, a free in internet ah a awm renga, mitin tana hman theih a ni.

A hmaa ka sawi tawh ang khan Adobe te leh Microsoft Office te ang product kher kher i hmang duh anih lem loh chuan harsatna i tawk lutuk lem lo anga, games pawh mil loh a ngah ve ang reng a, mahse hei hi chu a tihdan dang ala awma, a chipchiar deuh avangin nidanga sawi ah khek rih ila. Computer hmang thiamlo ber tan pawh hman awlsam thei ang ber turin awlsam takin a siam theih a, sap tawng tlem tlem i chhiar thiama i hriatthiam chuan han bo viau na tur hi a awm lem lo.

A bik takin ka'n ti teh ang.. Computer kaihhnawih lama hna nei emaw Development lampang khawih ve hlek tawh hrim hrim tan hi chuan a tha vek mai. A thatna zawng zawng kan sawi vek seng rih lo, blog hran ziah na tham khawpa topic zau ala ni heipawh hi.

Eng distro nge ka thlan ang?

Linux kernel hmang distribution hrang hrang te hi hlawm lian deuh deuh in an theih theiha, chumi hlawm lian bechhan chuan distro tenau zawk te anlo siam ve leh thin.

Distribution lian zualpui te chu: Debian te, Arch te, Red Hat Enterprise Linux (RHEL) te an ni a, heng ho hi chu a sul su tu te chauh an ni a, hemi te atang hian peng hrang tamtak an la awm ani. A distro in kungkaih dan leh inthlah chhawn dan angin ka rawn then hrang mai anga, a that dan indawt a ni kher lo tih kha minlo hriat sak dawn nia.

Distro tha ber leh chungnung ber a awm thei bik chuang lova, kan hman duh dan leh kan thil tih duh min tih tir theih dan a zirin tha kan ti in kan ti lo vel mai mai a ni.

Distro hrang hrang te chu i han bih chiang dawn ila, a lar ber Debian atangin tan teh ang:

Debian

Debian hi Linux hmang thar te tan chuan distro hman awlsam ber pawl a ni awm e. Amah Debian ai mah hi chuan Debian atanga an lak chhawn, Ubuntu te hi an lar mah zawk a. Mahse Debian based siam anih tho tho avang hian an hman dan a inang reng a ni. Linux distribution tin te hian anmahni package manager an nei veka, Debian leh a fa te (ti tawh mai ang) ho hi chuan apt package manager an hmang veka, kan package hman duh ang tam zawk hi chu apt hmanga install mai theihin a awm deuh tlangpui.

Ubuntu erawh hi chuan apt chu hmang tho mahse an snap package ho hi an rawn chhuang teh hawrh viau a, a that na chen chu tamtak pawh a awm ang, mahse ka mimal ngaihdan ah erawh chuan sandbox mode a application tam zawk a run thin avang hian ka ngaina tehchiam lem lo.

PopOS te, Kubuntu te, Linux Mint te pawh hi Debian thlah vek tho an ni a, amah Debian hrim hrim hian Gnome Desktop Environment hman nuam tak, awlsam bawk si an hman avang hian PopOs te, Kubuntu emaw Ubuntu emaw awh ni se, han hman thiamloh chhan em em tur a awm lem lova, Linux rawn hmang tir tan pawh hman nuam tak tura duan a ni.

Red Hat Enterprise Linux (RHEL)

RedHat Linux ho hi chu corporate ta anih vang hian mimal chuan kan hmang ngai meuh lova, man nei a ni nghe nghe. "Engati nge Linux distribution zawng zawng a free in ka hre sia?" in lo ti maithei. RedHat ho hi chuan data server lian tak an neia, an customer te data lian tham leh tam tham tak tak dahthat nan an hmang thin. An security te an thuam tha hle a, an customer ten anmahni a an in buaipui ngai lovin server lam security te leh a tul dang tamtak kha anlo thawh sak a, security te zawng zawng nen him takin server a an data kha anlo vawn sak a. Chutiang thil, customer ten an buaipui ngai lova an security nen lam an lo enkawl sak vek thin avang chuan pawisa te pawh an chawi tir ve thin ani.

RedHat ho based tho hian Linux operating system free version a awm ve a, chu erawh chu CentOS an ti ve thung a, RedHat ho Linux ang chiah chiah kha a ni a, yum package manager a hmang ve tho a, CentOS vel hi chu ka hman tam lutuk loh avangin mimal ngaihdan erawh ka nei teh chiam lova, a enchhin duh hrim hrim tan chuan CentOS hi install ve ngei chi ani e. Anni pawh an operating system hi a fel fai in, company ir awm chhuak tih tak ah, a formal ruih mai.

Fedora pawh hi hemi te chhungkua zingah hian chhiar tel ve mai ila, a chhan chu an inhlat em em lo bawka, package manager atan hian yum/dnf an hmang ve tho a, Fedora hi chu tlemin a update fal deuh hlek thina, RedHat leh CentOS in la tem loh thil thar, update thar, feature thar te an lo tem hmasa ve thin. Development lam khawih phei chuan an hmang uar viau bawk.

Arch Linux

Arch Linux phei hi chu Linux khawvel rawn hmelhriat thar ho tan phei chuan hnim hnai lo law law ila a fuh zawk ti ila kan sawi sual awm lo ve. He distro hi chu Linux expert deuh chin tana siam a nih vang ani.

A install dan hi a hautak ve a, i install dawnin mahni a disk partition ti chawp vek a ngaia, a tir phei chuan CLI chiah a chhawm avangin i session manager tur te, desktop environment emaw window manager emaw pawh hmang duh la, a bul atangin engkim i install a ngaih avangin tihtur a tam mai bakah tihsual a hlauhawm ve thin a.

Chuti chung pawha Arch ila hmang ve hram duh anih chuan Manjaro, EndeavourOS, Arco Linux tih ang vel chi, pre-configured Arch based distro ho hi download mai a fin thlak ang.

Arch hi Linux hmang thar ho tana a fuh loh ve leh deuh nachhan chu, rolling distro anih avangin update engkim hi a stable vek kher lo theia, bug emaw problem neih na chance a sang hle. Ka hriat theih chinah Manjaro hi chuan anmahni pualin stable release hran an neih avangin Manjaro i hman chuan thlamuang deuhin i update thei ang.

Engpawh chu ni se, Linux khawl ho i thiam chian hnua i duh duha i sawp kual theih hnuah Arch hi chu va hnim hnai ve chauh la a pawi awm lo ve. Mahse, thil pakhat ka sawi tel duh chu Arch Wiki hi ani. He wiki hi Linux wikipedia ti ila kan sawi sual awm lo ve. Arch Linux hi a tir te atanga engkim configure ngai anih avangin he wiki ah hian thil a chikim em em a, Arch hmang ve kher lo, Linux dang hmang tan pawn website tangkai tak ani bawk.

Conclusion

Aw le, ka han sawi deuh duah nang a, Linux hmang tir tan chuan choice a tlem viau tho mai a, Debian leh Debian based a siam Ubuntu te ang te hian bul tan ila a duh ber mai. I mamawh tlangpui chu a in install sa vek a, hman nghal mai theih tura awlsam taka duan a ni. Linux based operating system hrim hrim install dan hi chu a hranpa in ka rawn dah leh anga, awlsam taka Google mai theih a ni bawk.

Linux han hman tantirh hi chuan hman ngaihna hriatloh te a awl ve hle a, ninawm lamah te pawh a kal ve bawk thin. Mahse, kan hman nasat poh leh kan hmang thiam thuai tih hi hriat tur a ni. I hman tam poh leh a thatna i hria anga a potential pawh i hmang chhuak nasa dawn ani.

I lo chhiar avangin ka lawm e, article dang ka ziah te hi minlo chhiar sak ve la, in lo hlawkpui mial tak in..