Gnome chu enge?
Gnome chu kan Linux distro hriat lar ber leh hman lar ber pawl Ubuntu in a User Interface a rawn chhawm, a desktop lan dan ber hi a ni mai ang chu. Gnome Desktop Environment hi Debian leh a chhungkua, Ubuntu, PopOs, etc tih vel te hian an rawn chhawm tlangpui a, Debian based distro ho zinga Gnome environment chhawm lo langsar zinga mi chu Kubuntu tih te ang hi an ni awm e. An ni hi chuan KDE Plasma an hman avangin an hmelhmang leh lan dan te pawh a danglama, duh dana chei danglam erawh an awlsam hle thung. KDE Plasma te hi chuan an theme store atanga awlsam taka theme thar install theih an neih avangin blog han ziah hluai pawh a ngai lem lova, awl chu a awlsam zawk hle a ni.
Gnome desktop erawh hi chu an rawn dah ang ang a hman atan hi chuan a lang hlui ve bel bul thin hle a, tlema hmel mawi deuh leh hmuh nuam deuha a theme vel han chei danglam hi a hmangtu tam zawk duhthusam a ni thin. Tunah chuan hmanrua tha tak tak a tam tawha, user community in anmahni duh dana an theme siam tamtak download a install mai theih turin a awm tawh a, chumi install dan leh install hmaa thil tih tur pawimawh tamtak kan sawi dawn a ni.
Thil tih hmasak ngai te:
Gnome theme thlak danglam tur chuan gnome cmmands te chhut duah a ngai thin a, chumi pumpelh zawng chuan, a aia kawng awlsam zawkin kan ti dawn ani. A hmasa berah chuan Gnome Shell Extensions kan install ang:
sudo apt install gnome-shell-extensions -y
Hemi shell extensions i install zawhah hian i Applications menu ah khan 'Extensions' tih app a lo awm anga, chu chu hawng la, i scroll thla zel anga, "User Themes" tih i hmuh hunah kha kha on/enable rawh le. Tichuan app dang pakhat kan install leh ang:
sudo apt install gnome-tweaks -y
Hei ve thung erawh hi chuan "Tweaks" tih application a install ve thung ang. He tweaks application hmang hian kan theme download thar te kha command chhut duah ngailo in awlsam te in kan thlak zung zung tawh mai dawn ani.
Theme chu install ila:
Le, internet ami GTK themes leh shell themes kan duh duh kan download thei ta. Icon pack te, cursors te thlengin duh duh kan install tawh mai dawn ani. Kei chuan Dracula theme ka ngainat avangin tuna ka example atan hian Dracula GTK theme ka rawn download dawn ani.
Dracula Themes Website ah hian kan va lut anga, GTK theme i va zawng ang. A chhan chu Gnome hian GTK themes a hman vang ani.
GTK icon khi i click anga chuan a page chhunga i luh hnu khan a sir dinglamah a zip file download na tur alo awm anga, "Download ZIP file" tih ah hian i click anga, zip file i download ang.
Tichuan i zip file download thar chu i va unzip/extract anga, tichuan a folder chu a inthuah nge thuah lo i endik phawt ang. A inthuah ka tih awmzia chu, i folder extract kha 'dracula-gtk' tih ni ta se, khami chhunga i luh khan 'dracula' tih tho emaw folder alo awm chhawng leha, chumi chhunga luh leh chuan a source file ho chauh alo awm thin. Chutia a inthuah chuan i computer in theme kha a load fuh theiloa, chuvangin i lakchhuah a ngai a. 'Dracula-gtk' tih folder chhungah khan a source file a awm nghal tur ani. Chuti lo chu i theme thar install kha i computer khan a hmu dawnlo ani.
~/Downloads/dracula-gtk/dracula-gtk/source-files* tih ang vela a awm chhawn hi chuan a folder thuah tu pakhat hi i paih anga, ~/Downloads/dracula-gtk/source-files* tiin a awm tur ani. He thil hi Dracula themes ah chauh hian ani lova, Website dang atanga theme folder engpawh i download chuan dark leh light version te kha folder pakhat chhugah folder hran in alo awm hrang thina, khatia awm hrang kha a mal te te a copy chhuah tur ani (hemi folder hi a awmna tur hmun ala nih loh avangin kan la sawn dawn).
Themes folder a awmna tura sawn dan
Heng themes folder kan download sa te hi ~/Downloads ah a awm tlangpui a, kan extract anih pawn a in download na directory ah khan kan extract chilh mai ka ringa, a pawi na a awm chuang lova, la sawn kual leh tho tur anih avangin.
Tunah hian kan sawn na tur hi chi hnih a awm theia, i user home directory ah khan .themes tih leh .icons tih han siam phawt mai la. Terminal i hawng anga,
cd ~
mkdir .themes .icons
A folder/directory hming khi dot(.) in a in tan tih khi theihnghilh loh tur ani a, Linux system ah reng reng chuan dot(.) atanga folder emaw file hming a in tan reng reng chuan automatic in a in hide ani. I file explorer atanga i tih lan duh chuan Ctrl + h hmeh hian hidden files leh folders alo lang thei thin. Nautilus file explorer ah chuan heihi default key bindings ania, heti lo pawh hian preference settings vel atang pawhin a tih lan theih tho ani. Tichuan, i theme download zawh tak, i extract thar hlim kha .themes folder ah khian a 'dracula-theme' folder pum i move lut ang.
I home directory a khitiang hidden folder khi i siam kher duhloh chuan /usr/share/themes/ ah leh /usr/share/icons/ ah pawh move la, i Gnome desktop khan a load tho tho dawn ani. Hemi folder awmna ka rawn sawi te pahnih khi a thawk ve ve a, mahse, i home a folder i siam chawp ami themes i load ho kha chuan nangma user tan chiah theme kha a neia, mahse /usr/share ami hi chuan Gnome system pum a huam thung ani. I home folder a i move hnua theme i thlak theihloh chuan /usr/share chhunga themes leh icons folder ah hian move chhin i tum dawn nia.
Theme dang, GTK theme chauh nilo kan install tel anga, shell theme atan "Sweet Dark v40" tih kan download anga, chumi chu Gnome-Look website atang hian a download theih a, icon te, cursor te, i duh duh zat kha a zip file in i download vek anga, i extract anga, tichuan themes chu 'themes' folder ah i move anga, icons leh cursors ho chu 'icons' folder ah i move thung ang.
Gnome Tweaks hmanga theme thlak
Gnome Tweaks hmangin kan themes install ho kha kan hmang chhin hlawm dawn ani. 'Tweaks' tih app kha han hawng la, "Appearance" tih section ah khan Applications theme kha Dracula-gtk chuan han thlak vel chhin la, shell theme atan erawh kha chuan Sweet Dark v40 kha kan hmang ang.
Icon leh cursors te pawh duh duh a hman theiha, i theme install/copy luh thar kha, a rawn in load tel lo anih chuan i computer te kha han restart vel chhin la, anih loh pawhin a hma a ka sawi ang khan a folder duh aiin alo in thuah tam te pawh ani ve thei. Check uluk la, a folder structure a dik anih phawt chuan a rawn in load tel em em ang.
Conclusion
Aw le, tunah chuan kan duh duh danin kan system theme te kan thlak kual thei ta bawk a, eng emaw tal in lo zir/thiam belh ve ka beisei a, thiam loh, tih dikloh leh hriat fuh loh alo awm palh tak leh in zawt hreh lo ila, inzirna vek ani. Tin, tuna ka thil install tur sawi pahnih, gnome-tweaks leh gnome-shell-extensions te hi Gnome Desktop hmang tu tan chuan engti kawng zawng emaw tala softawre pawimawh em em tur ani a, theme thlak nan lo chauh pawh thildang tangkai tamtak install nan te la ahman theih ani. Khi mi software pahnih ringawt pawh khi blog hran ziahna tham a ni a, blog dangah ka rawn cover leh dawn nia. Thank you for reading..